Select an Image

header photo

بیر مای بایرامی،

بیر مای بایرامی،

ایران فهله و زحمتکشلرینین شعارلاری

بو یازی 70 ایل اول بیر مای بایرامی ایله باغلی س.ج.پیشه وری¬نین آژیر قزئتینده نشر اولونموش یازیسیدیر.

بو گون بیر مای گونودور. دونیانین هاراسیندا کی، تشکیلاتلانمیش بیر زحمتکش و فهله وارسا، هارادا کی، فهله اؤزونو صینیفی شخصیت کیمی تانیییب‌سا، ایشینی بوراخاراق بو گونو بایرام ائدیر. او، بو گونده بیرلیک و همرای‌لیک نمایش ائتدیریر.

بیر مای بایرامی شنلیک و ایله‌نجه اوچون دئییل، بو گون ایله‌نمک اوچون بایرام ائدیلمیر. بو گون بیر مبارزه بایرامیدیر. بو گون ائله بیر بایرامدیر کی، فهله صینیفی بو واسیطه ایله اؤز گوجونو و قدرتینی سیناییر. او، اؤز شعارلارینی بوتون زحمتکشلره چاتدیرماق ایسته ییر و اونلارین هر بیری¬سینی مبارزه‌یه سسلییر. بو جهتدن بیر مای عموم زحمتکشلرین سیاسی مانئور گونودور.

۷۵ ایلده‌ن آرتیق‌دیر کی، دونیا زحمتکشلری طرفیندن بو بایرام قئید ائدیلیر. چئشیدلی شرایطلردن آسیلی اولمایاراق دونیانین قاباقجیل و دئموکراتیک اؤلکه‌لرینده بو گون بایرام ائدیلیر. حتی، بیر چوخ اؤلکه‌لرده همین گونده مناقیشه نتیجه‌سینده مختلیف نؤو حادثه‌لر باش وئریر، او جمله‌دن حبسه سالینانلار، سورگونه گؤندریله‌نلر و جانینی فدا ائد‌نلر ده چوخ اولور.

۲۵ ایلدیر کی، ایران زحمتکشلری ده بو بؤیوک و دونیه وی بایرامی قئید ائدیرلر. ۱۲۹۹-جو ه،ش(گونش) ایلینده بو گون ایله باغلی تهراندا عظمتلی نمایش کئچیریلدی. فهله‌لر سیپه‌سالار مسجیدینده چوخ جدی چیخیشلار تشکیل ائد‌رک، اؤز ایستک و آرزولاری اولان «سکّیز ساعت ایش واختی» و «مشروطه آنایاساسینین(کونستیتوسیا)» قورونماسینی اساس طلب کیمی ایر‌لی سوردولر. بو تاریخدن باشلایاراق هر ایل حتی، پهلوی رژیمی دؤورونون قارانلیق و قورخولو گونلرینده بئله ایران زحمتکشلری طرفیندن بو گون بایرام کیمی قئید اولونوردو. مختاری پولیسی(زندانین رئیسی- ی-ن) بو گونو خصوصی گون کیمی اؤز تقویم دفترینده قئید ائتمیشدی. او، بیلیردی کی، بو گون سیاسی اوو گونودور. او، تجروبه اساسیندا آنلامیشدی کی، نه یین باهاسینا اولورسا-اولسون فهله‌لر بیر مای گونونو قئید ائتمکله یاناشی، هم ده نمایش و کوچه یوروشلری تشکیل ائد‌جکلر. بئله‌لیکله ده بو نماییش بیر قروپ اینسانی تله‌یه سالماق اوچون پولیسه ایمکان یاراداجاق.

اگر سیاسی اداره‌یه(پولیسه) مراجعت ائدیلرسه، توتولانلارین اکثریتی همین گونه و یا بیر نئچه گون اوندان سونرایا تصاد ائدیلدی یی معلوم اولاجاق.

بوتون تضییق و اشک‌نجه‌لره باخمایاراق، زحمتکش و آزادلیق سئورلر اینسانلار طرفیندن بیر مای بایرامی قصر-قاجار حبسخاناسیندا دا قئید اولونوردو. اونلار همین گون زیندان مأمورلاری قارشیسیندا اؤز طلبلرینی ایره ‌لی سوروردولر. دونیا زحمتکشلری اوچون بو گونو بایرام کیمی قئید ائتمه‌یه چوخ‌لو بهانه‌لر مؤوجوددور.

دونیا زحمتکشلری فاشیزم علیهینه مبارزه‌ده قالیب گلمیشلر. ایتالیا زحمتکشلری آزادلیق دوشمه‌نی اولان موسولینینی اعدام ائتمکله آزدلیغا دوغرو ایلک آدیمی آتمیشلار. بئله¬لیکله، اونلار زیندانلاردا قانیچن فاشیزیمین قولدورلارینین اشک‌نجه‌سی آلتیندا اولان مینلرله مبارز فهله و فداکار سوسیالیستلرین انتقامینی آلمیشلار. بو گون ایتالیانین مرکزینده عظمت‌لی سووئت دؤولتینین بایراغی دالغالانیر. بو قیرمیزی بایراغین اوزرینده فهله-کندلی بیرلیگینین رمزی اولان اوراق و چکیج علامتلری زحمتکشلرین حقوقلارینی تاپدالایان آزادلیق دوشمه‌نلرینین گؤزلرینی قاماشدیریر.

کئچن ایل اینگیلتره و سووئتدن باشقا بوتون آوروپا اؤلکه‌لری فاشیزم بایراغی آلتینا کئچدی. او اؤلکه‌لرین فهله‌لری قارانلیقدا، یئر آلتیندا، زاوودلاردا ایشلیرکن یئنه ده بو گونو قئید ائدیردیلر. آرتیق بو گون بو اؤلکه‌لر تمامی ایله فاشیزم ظلموندن آزاد اولموشلار. آوروپانین هر یئرینده فهله صینیفین گوجو چوخالمیش، اینکیشاف ائتمیش، بیرلیگی محکملنمیش‌ و بوتون زحمتکئش صینیفلرینی اؤز بایراغی آلتینا آلمیشدیر.

حقیقتاَ بو ایل بیر مای بایرامی آردیچیل و مختلف غلبه شنلیکلری ایله قاریشاراق، دونیا زحمتکشلرین حسلرینی ریقّته گتیرمیش و جوشدورموشدور.

دونیا فهله‌لرینین شعارلاری صلحو برقرار ائتمک، فاشیزمین بوتون ایزلرینی سیلمک، دیکتاتورلوغا و ظلمه سون قویماقدان عبارتدیر.

بیز ایران زحمتکشلری ده سئوینیریک کی، آزادلیق بخش ائد‌ن دونیا فهله صینفیله همیشه اولدوغو کیمی امکداشلیق ائد‌رک، بو دونیه وی بؤیوک بایرامدا همرای‌لیک گؤسترمکله، اونلارین آغیر مبارزه‌سینه قاتیلیریق.

یوخاریدا قئید ائتدیگیمیز کیمی مای بایرامی باشقا شنلیکلرله فرقله¬نیر. بو گون مبارزه گونودور. سیناق و سیاسی مانئور گونودور. بیرلیک و همرایلیگین تمه‌لی قویولان گوندور. بو گون حاکم و ظلمکار صینیفه «آیاغینی فهله آیاققابیسیندان چیخارتمالیسان! اونون قارشیسیندا باش ایمه‌لی‌سه‌ن! اونلارین طلبلرینی یئرینه یئتیرمه‌لی‌سه‌ن!» - دئییله‌ن گوندور.

بو بایرامدا بیزیم شعارلاریمیز آچیق و آیدیندیر.

۱- بیز ظلمون، عدالتسیزلیگین کؤکونو کسمک ایسته ییریک!

۲- کونستیتوسیا و آزادلیق پرینسیپلری تأمین اولمالیدیر. دئمکراتیا رژیمی- قلم آزادلیغی- دیل آزادلیغی- جمعیت آزادلیغی- وجدان آزادلیغی- عقیده و مسلک آزادلیغی شعارلاری تمامی ایله برپا اولونمالیدیر! ۳

- دیکتاتور دؤورونون یاراماز(منهوس) قانونلاری، خصوصیله ملی شورا مجلیسلرینده کونستیتوسیا علیهینه چیخاریلان قانونلار لغو اولونمالیدیر! داور و مختارینین قارا قانون(آلدادیجی تهلوکه سیزیلیگی قوروماق و حقیقت ده آزادلیغی بوغماق اوچون چیخاریلان قانون) تئزلیکله لغو اولونمالیدیر.

دوغوردان دا، دئموکراتیا و آزادلیق ادعاسیندا اولان اؤلکه اوچون ۱۳۱۰ ایلده چیخاریلان قارا قانونون هله ده لغو اولونماماسی بیابیرچی‌لیقدیر.

بو گون بوتون دونیادا ان رادیکال سول پارتیالار دؤولت کوالیسیاسیندا اشتراک ائدیرلر. اما بیزیم اؤلکه‌ده مختاری قانونو پارتیا و جمعیتلرین اولماسینی جنایت سایاراق، گویا کی، اؤلکه‌نین امنیتینه تهلوکه دیر دئیه¬رک، سیاسی فعالیتله مشغول اولانلاری اعدام و عؤمورلوک حبس ائتمکله قورخودور.

بیز بوتون دونیایا اعلان ائدیریک کی، اؤلکه‌میزده آزادلیق و دئموکراتیادان اثر-علامت یوخدور. اگر بیزیم حاکملریمیزین اللرینه کیچیک بیر فرصت دوشرسه، بوتون آزادلیق¬سئور اینسانلاری محو ائدرلر. اجتماعیتده آزادلیق اوچون مبارزه ائد‌ن یالنیز فهله و زحمتکش صینیفی‌دیر. لاکین حاکم صینیف، خصوصیله صاحبکارلار آزادلیغی تاپدالاماق و زحمتکشلر تشکیلاتلارینی داغیتماق اوچون قانلی جنایتلر تؤردمیشلر. فهله‌نین شعاری ایشسیزلیگی آرادان قالدیرماق و فهله‌لری سغورتا(بیمه) ائتمک‌دیر. بیزیم شعاریمیز معاشین آزالتماسینا و ایش ساعتینین آرتیریرماسینا قارشی جدی مبارزه آپارماق اولاجاق. بیر داها تکرار ائدیریک- آنجاق و آنجاق بیرلیک و همرای‌لیک نتیجه‌سینده بونلاری الده ائتمک اولار. دئمه‌لی، بو ایل بیر مای بایرامینین اساس هدفی بیرلیگه و همرای‌لیگه نایل اولماقدیر. قولدور دسته‌لرینی فهله تشکیلاتلاریندان اوزاقلاشدیرماق لازیمدیر. تعجیلی صورتده ایکی اوزلو، فتنه کار عنصرلر فهله تشکیلاتلاریندان چیخاریلمالیدیر. غلبه آزادلیق جبهه‌سیله‌دیر. دونیانین بوتون آزادلیق¬سئور اینسانلارینین سؤیکه‌نه‌سی یئر زحمتکشلر صینیفی‌دیر.

یاشاسین دونیا فهله‌لرینین بیرلیگی!

سید جعفر پیشه وری - آژیر قزئتی. ۱۱ اوردیبئهئش ۱۳۲۴( ۱. مای. ۱۹۴۵)

Go Back

Comment