باغچاباخین خاطره‌سینه
ایلک اوشاق باغچاسی و ایلک کارلار مکتبی‌نین بانی‌سی
25 اوکتیابر بؤیوک آذربایجان معلمی، ضیا‌لی‌سی، ایلک اوشاق باغچاسی و ایلک کارلار مکتبی‌نین بانی‌سی، عینی زاماندا ایراندا اوشاق کیتاب‌لاری‌نین ایلک مؤلفی و نشری ایله مشغول اولان جاببار باغچابانین وفاتی‌نین ایلدؤنومودور ...
میرزه جاببار عسگرزاده 1875-جی ایل مایین 10-دا بو گونکی ائرمنیستانین پایتاختی یئرئواندا آنا‌دان اولوب. آتاسی تبریزلی عسگر بننا ایروانا موهاجیرت ائتمیش. ایرواندا مئماریق و شیرنیاتچی‌لیق پئشه‌سیله مشغول اولموشور. باغچابان کؤهنه اصوللا مسجیدلرده تحصیل آلمیش،15 یاشیندا اولارکن اقتصادی چتین‌لیک‌لر اوزون‌دن مکتب‌دن چیخماق و آتاسی‌نین پئشه‌سینه اوز توتماق مجبوریتینده قالمیش‌دیر. او، گنج یاش‌لاریندا اولاردن ائوده گیزلی شکیلده قیزلارا درس اؤیردیردی و قافقاز قزئت‌لری‌نین موخبیرلرین‌دن بیری اولا‌راق موللانسرددی‌نین یوموریستیک قزئتی‌نین ساتیریک یازیچی و شاعرلرین‌دن بیری ایدی.
-1922جی ایلده ایروان‌داکی "لکلک" ژورنا‌لی‌نین رئداکتورو اولموش. آذربایجان‌لی یئرلی و مسلمان مهاجیرلرین تعقیب و قووولماسی، آجلیق، خسته‌لیک و یئرلی موناقیشه لر زامان، هابئله والیدئین‌لری‌نین اؤلومون‌دن سونرا 1920-جی ایلده وطه‌نینه یولا دوشدو. نهایت، او دؤورده تئز-تئز راست گلینن بعضی اؤلودوروجو خسته‌لیک‌لرین پنجه‌سین‌دن قورتولا‌راق آیاق بارماق‌لارینی ایتیردیک‌دن سونرا اؤلوم‌دن جانینی قورتارماق اوچون مرنده گئتمیش. مرنددکی احمدیه خالق مکتبینده آیدا 90 ریال معاشلا معلم ایشلمیش. یئنی تدریس مئتودو سایه‌سینده 1921-جی ایلده تبریز مدنیت مدیری‌نین فرمانینا اساساً او شهره گئده‌رک اورادا تدریسله مشغول اولموش. 1924-جو ایلده او دؤورون معاریف و مدنیت ایداره‌سی‌نین رئیسی "فیوضاد" این امری ایله تبریزده “اوشاق باغچاسی” آدی ایله ایلک ایران اوشاق باغچاسینی تشکیلئتمیش و او زامان‌دان اعتباراً سوی آدینی عسگرزاده‌دن باغچابانا ده ییشمیش‌دیر. 1924-جو ایلده تبریزده ایلک اوغلان و قیز اوشاق‌لاری‌نین بیرگه مکتبینی تأسیس ائتمیش. اها‌لی حتی اوغول‌لارینی تحصیل آلماغا حاضر اولمادیق‌لاری شرایطده او، بو مکتبی یاراتمش. باغچابانین بو مکتبی‌نین بیرینجی صینیف شاگیردلری آراسیندا اوچ لال و کار شاگیرد ده وار ایدی. ائله بو مسئله باغچابانین کارلار و لال‌لار اوچون بیر مکتب یاراتماسی فیکرینه سبب اولموش‌دور. بو فیکرین آردینجا 1926-جی ایلده باغچابان اوشق‌لار باغچاسیندا لال‌لار و کارلارین تعلیم-تربییه‌سی اوچون بیر صینیف آچا‌راق او اوچ شاگیرده تدریس ائتمیشدیر.
او، 1933-جونیلده تئهرانا گله‌رک کارلار و لال‌لار اوچون مکتب تأسیس ائتمیش او، کارلار اوچون بیر جیهاز ایختیرا ائتمیش، اونلار دیش واسطه‌سی ایله ائشیتمه‌یه قادیر اولموش‌لار.
او، 1943-جو ایلده "کار و لال اوشاق‌لارین مدافعه‌سی" آدلی جمعیتی تأسیس ائتمیشدیر.
باغچابان شاگیردلرینی اؤیرتمک اوچون کؤهنه شدت‌لی مئتوددان چوخ فرق‌لی اولان یئنی اصول‌لاردان ایستیفاده ائتمیش.
1913-جو ایلده چاپ و ایستئرئوتیپین بؤیوک چتین‌لیک‌لرینه باخمایا‌راق، اؤز رسم‌لری ایله اوشاق‌لار اوچون خصوصی کیتاب‌لار نشر ائتدیرمه‌یه باشلامیش‌دیر.
کیتابلاریندان بیری "قار آدامی" آدلی "اوشاق و یئنی‌یئتمه‌لرین اینتئللئکتوال اینکیشاف مرکزی" طرفین‌دن نشر اولونموش و "دونیا اوشاق کیتاب شوراسی" طرفین‌دن ان یاخشی اوشاق کیتابی سئچیلمیش‌دیر.
بو بؤیوک و گؤرکم‌لی آذربایجان‌لی، 1966-جی ایل نویابر آیی‌نین 25-ده قیسا بیر خسته‌لیک‌دن سونرا 81 یاشیندا وفات ائتمیشدیر.
