داسی (کریماوف) آغامینین انقلابی فعالیتی
من، آتامین انقلابی فعالیتیندن یازماغی اؤزومه بورج بیلیرم.
داسی (کریماوف) آغامی عبدالکریم اوغلو، ۱۹۰۰-جو ایلده جنوبی آذربایجانین اردبیل ویلایتینین هوشنه کندینده اکینچی عائله‌سینده آنادان اولموشدور. او، مشروطه اینقیلابین‌دان سونرا، ۱۹۱۱-جی ایلده یوخسوللوق اوزوندن اؤز والیدئینلری ایله بیرلیکده شیمالی آذربایجانا، ایندیکی بولبوله قصبه‌سینه (کندینه) مهاجیرت ائتمیشدیر. آغامی عبدالکریم اوغلو قیسا بیر واختدا والیدئینلرینه کؤمک ائتمک اوچون سوراخانی نئفت بوروقلارینا ایشه دوزلیر. باشقا نئفتچیلر کیمی قوروجولوق ایشلرینده چوخ یاخیندان ایشتیراک ائدیر. بو ایشگذارلیغی ایله او تئز بیر زاماندا اوستا کؤمکچی‌سیندن بوروق اوستاسینا قدر یوکسلیر.
۱۹۳۷-۳۸-جی ایللرده ایرانلیلاری ایرانا و اورتا آسییانین ان اوجقار یئرلرینه سورگون ائدرکن او، یاخین آداملارینین بیر چوخونو ایتیرمه‌سینه باخمایاراق، یئنی قوردوغو عائله‌سی ایله بیرلیکده یئنیدن ایرانا، دوغما هوشنه کندینه گلیر. ایراندا آلوولانان آزادلیق حرکاتینی گؤرور و اونا یاخین قوهوملاریندان باشقا، اینانیلمیش وطنپرور اوغوللار علاقه ساخلاییر.
او، بوتون شعورلو حیاتینی شانلی «۲۱ آذر» حرکاتینا صرف ائتمیشدیر. او، گیزلی حزب- توده نین (ایران خلق پارتییاسینین) عضوو اولدوغو واخت (ممی)، اما آذربایجاندا آچیق مبارزه ایللرینده ایسه داسی آغامی آدی ایله تانینمیشدیر.
گؤزل تشکیلاتچی اولموش بو آدام ۱۹۴۵- جی ایلده ایراندا، خصوصاً، آذربایجاندا آلوولانان انقلابی مبارزه نین اؤن جرگه سینده گئدنلردن بیری اولموشدور.
«۲۱ آذر انقلابینین غلبه سی اونون قلبینین سئوینجینه چئوریلمیش و فرقه‌نین بوتون تاپشیریقلارینی یئرینه یئتیرمهیه خصوصی سعی ائتمیش، شاهدان قالما سلاحلارین خانلاردان، بئیلردن، مولکدارلاردان آلینماسیندا یاخیندان اشتراک ائتمیشدیر. او، هر شئیدن اول وطنپرور ایدی.
۱۹۴۵- جی ایلده «۲۱ آذر» حرکاتینین تاریخی غلبه‌سیندن سونرا بیر وطنداش کیمی او، پیله چایی کندلرینده اولان بوتون آچیق فکرلی گنجلری بیر یئره توپلامیش، فرقه سیرالارینا جلب ائتمیشدیر. آغامی داسینین فداکارلیغی، ایشگذارلیغی، وطنپرورلیگی تئز بیر زاماندا اردبیل شهر کومیته سینه ده چاتیر. او، پیله چایی کمیته‌سینه صدر وظیفه‌سینه سئچیلیر. اونا، فعالیتینه گؤره ان شرفلی مئدال وئریلیر.
بوتون بو ایشلردن سونرا، ۱۹۴۶-جی ایلده آدف-نین موقتی گئری چکیلمه سی زمانی او عائله سیندن بیر نئچه واخت آیری دوشور. لاکن چتینلیکلرینه باخمایاراق، آغامی کیشی اؤز انقلابی مبارزه‌سینی شیمالی آذربایجانین شکی شهرینده شرفله داوام ائتدیریر.
او، شکی شهر کمیته‌سینین تشکیلینده الیندن گلنی ائدیر. گئجه- گوندوز مؤسیسه ده ایشلهمکله برابر گنجلری ده یاددان چیخامیر. او، گنجلرین ساوادسیزلیغینین لغو اولونماسینا چوخ چالیشیردی. آتام جاوانلارین گئجه کورسلاریندا اوخوماسینا یاخیندان کؤمکلیک ائدیردی. آغامینین لاتینجا ساوادی چوخ گؤزل ایدی. اونون فکری یالنیز جاوانلارین ساوادلانماسی ایدی.
گؤزل خاصیتلی، ناموسلو فرقه‌چی، اصل وطنپرور اولان آغامی کیشی بوتون مهاجیرت ایللرینده شکی شهرینین تیکینتی- تعمیر اداره سینده، تصروفاتدا جانلا-باشلا ایشلهدیگیندن او واختین شرفلی موکافاتی- لئنین اوردئنی ایله تلتیف اولونور.
آغامی شهر کمیته سینین بوتون ایشلرینده فعال ایشلهمیش، امهیی اولموشدور. اوزون ایللر اونونلا ایشلهمیش آداملار بو انسانین یورولمازلیغینا، مردلیگینه، انسانلیغینا، وطنپرورلیگینه، بیلیگینه حسد آپارمیشلار.
او، عمرونون آخیرینا کیمی کمیته ایشلرینده ایشلهمیشدیر. افسوس کی، اوزون سورن خسته لیکدن سونرا ۱۹۷۳- جو ایلده وفات ائتمیشدیر.
(داسی) کریماوف صیاد آغامی اوغلو
۲۰۱۷.۱۱.۲۲ - جی ایل
