فریدون ابراهیمی قوندارما حربی محکمه‌ده:
گله‌جک زحمتکئشلریندیر!
تبریز حبس‌خاناسیندا آلتی آی ایشکنجه ائدیلدیکدن سونرا فریدون ابراهیمی تهرانین قصر قاجار زیندانینا آپاریلدی. محبوسلاری ایشکنجه ائتمکده قصر قاجار حبس‌خاناسی رئیسی‌نین بؤیوک مهارتی وار ایدی. بو زینداندا بیر محبوس تسلیم، تووبه و اعتراف ائتمه‌دن، اورا‌دان آلنیآچیق، ساغلام خلاص اولا بیلمزدی.
لاکین نه قارانلیق کامئرا‌لار، نه ده آیلارلا گئجه-گوندوز داوام ائدن وحشیجه‌سینه ایشکنجه‌لرین هئچ بیری فریدونون اراده‌سینی سارسیدا بیلمه‌دی. او، محکم اراده ایله اؤز ایدئیاللاریندان و بیر ایل داوام ائدن آذربایجان میللی حکومتین‌دن مدافعه ائتدی.
محکمه‌نین بیر اجلاسیندا اوندان سوروشولدو:
نیه و نه اوجون اؤلوم حکمو چیخاریردین؟
فیریدون قطعیتله جاواب وئردی؟
اولا من تبریز اها‌لی‌سی‌نین جانانینا سوسایان قولدورلار و اوغرولار اوچون اؤلوم حکمو چیخاریردیم. میللی حکومتین قانونلاری اساسیندا اونلاری محکوم ائدیردیم.
هانسی قانون؟ هانسی حکومت؟ ایراندا یالنیز بیر حکومت واردیر.
فریدونون جاوابی ایسه آیدین و قطعی ایدی:
آذربایجان حکومتی! بیزیم میللی حکومتین قانونو! او حکومت، یاشاییر و یاشایا‌جاقدار!
***
سحر تئزدن ژورنالیست‌لر محکمه سالونونا داخیل اولا‌راق اونلارا آیریلمیش یئرلرده یئرلشدیلر. اونلارین اکثریتی هیجان ایچینده ایدی‌لر. چونکی فیریدون تکجه بیر گنج سیاستچی دئییل، هم ده بیر اینقیلابچی، آلتی-یئددی آی اول قان ایچینده بؤغولموش میللی حرکاتدان یارانان حکومتین باش پروکرورو اولموش‌دور. منصیفلر هئیتی اؤز یئرلرینده یئرلشدیلر.
تاماشاچیلا فیرقه دؤورونده قولدورلارین، اوغرولارین دوشمنی اولموش و خالقین حاقینی اونلاردان آلان فریدون ابراهیمینی گؤروب، دینلمک اوچون نفسلرینی سینه‌لرینده حبس ائتمیشدی‌لر. بو پروکرور هم تودهچی و هم ده فیرقهچی ایدی. بو اونون اوچون حربی محکمه هئیتی طرفیندن بؤیوک و باغیشلانماز جزا ساییلیردی. هم بو ایکی جزا و هم ده میر خاصین "قتله" فیتواسی نتیجه‌سینده خانلارین سلاحلی قولدورلاری‌نین الی ایله بیر چوخ آذربایجان اها‌لیسی قتل عام اولدو. آذربایجان دئموکرات فیرقه‌سی‌نین پروکرورو فریدون ابراهیمی بو قتل عامدان یاخا قورتاران نادر شخصلردن بیری اولا‌راق بو محکمه‌ده محاکیمه اولونوردو. او پروکرور بیر چوخ سلاحداشلاری کیمی اؤز طالعینی خالقی‌نین طالعیندن آییرماق ایستهمیردی.
هامی گؤزلهیهرکن محکمه صدری منصیفلر هئیتی‌نین یانیندا دایانمیش ضابطه اشاره ائتدی. ضابط تلهسیک یولا دوشوب سالونداکی قابینی آچاراق باییرا چیخدی. گئرییه دؤندوکده اونونلا یاناشی باشقا ایکی حربیجی فریدونو الی قانداللی و زیندان گئییمینده سالونا گتیردی.
ژورنالیستلرین فوتوآپاراتلاری ایشه دوشدو. باخیشلار اوجا بویلو، ایتیباخیشلی و ای قانداللی فریدونا طرف زیللنهمیشدی. اونو متهیملر کورسوسونه طرف آپاریردیلار. فریدون تبسم و غرورلا ژورنالیسترین قارشیسیندان کئچرکن سانکی او، پروکرور و منصیفلر هئیتی ایسه متهیم ایدی‌لر!
پالکوونیک زنگنه فریدونو قورخولو گؤزلرله مشاهیده ائدجهیینی دوشونورک وحشیجه‌سینه گؤزونو اونا دیکمیشدی. لاکین اونون تصوورونون عکسینه اولا‌راق فریدون محکم اراده ایله سالونو آددیملاییردی. بو وضعیتی گؤرن زنگنه تبریز محکمه‌سینده فریدونون قارشی‌سیندا اؤزونون نه قدر ضعیف اراده‌لی و عاجیز اولدوغونا بیر داها امین اولدو. زنگنه امید ائدیردی کی، فریدونا اؤلوم حکمو چیخاریلان آن دوداقلارینداکی تبسم محو اولوب، سیماسینی غم-کدر بوریه‌جک و اونون سیماسیندا ضعیف‌لیک و تسلیمچیلیگی گؤره‌جک. زنگنه بیر چوخ اراده‌لی شخصلر باره‌ده اؤلوم حکمو چیخاریلارکن اونلاردا قورخو و عاجیزلیک حسی‌نین شاهیدی اولموشدو. نئجهکی فریدونون چیخارتدیغی اؤلوم حکم اونون اؤزونده بئله تأثیری بوراخمیشدی. زنگنه ده فریدون کیمی حکم چیخاریلما‌دان اؤنجه اونون مضمونوندان آگاه ایدی. بو اوزدن ده امید ائدیردی کی، چیخاریلان اؤلوم حکمو فریدوندا دا قورخو و عاجیزلیک حسینی بوراخا‌جاق‌دیر... اما فریدونون نیفرت دولو آلوو‌لو باخیشی سانکی زنگنهنی یاندیریب-یاخیردی.
نهایت، ساکیت‌لیک حکم سوررکن محکمه باشلاندی. اوردو مستنطیقی اونا تاپشیریلان آغیر اتهاملاری اوخودو:
سن آذربایجان دئمکرات فرقه‌سی‌نین پروکرورو اولا‌راق اؤلوم حکمو چیخاریب و آدام اؤلدوروبسن. بو باره‌ده اؤزونو مدافعه ائده بیلرسن؟
فریدون سویوققان‌لیقلا باشینی ترپه‌ده‌رک اتهاملاری قبول ائتمیش کیمی دئدی:
من آنجاق خالق دوشمنلری اوچون بئله حکمو چیخارمیشام. بلی آذربایجنین مختلیف عائله‌لری‌نین شیکایتلری اساسیندا اونلارنین آساییشینی پوزان قولدورلار، جانیلر و سویغونچولار اوچون بئله حکم اوخوموشام. او جمله‌دن بو جینایتکار دسته‌لری‌نین باشچیسی اولان قارنی ییرتیق کازیمی محاکیمه ائدیب دار آغاچیندان آسدیرمیشام. محبوسلارین پروبلئملرینی آراشدیریب، 21 آذر حرکاتیندان اؤنجه حبسه دوشنلرین اکثریتی خانلارین و بؤیوک ملکه‌دارلارین شیکایتلری اساسیندا حبس اولدوقلاری اوچون بوراخدیم. سونرا سؤزونه داوام ائتدی:
آذربایجانین ایگید خالقی‌نین ایستهیی ایله بو جینایتکارلاری محاکیمه ائتمیشم. خالقین راحت و آساییشده یاشاماسی اوچون بو پارازیتلری محو ائتمکله اونون ایستهیینی یئرینه یئتیرمیشم.
حربی حاکم بو سؤزلر قارشی‌سیندا ترک سلاح اولموش شخص کیمی منصیفلر هئیتینه باخدی. منصیفلر هئیتی‌نین صدری اوزونو فریدونا توتا‌راق سوروشدوو:
گؤردوگون عمللردن پشیمان دئییلسن؟
فریدون باشینی دیک توتا‌راق منصیفلر هئیتی‌نین گؤزونون ایچینه باخایب دئدی:
نه اینکی پشیمان دئییلم، بلکه ائتدییم عمللریمه ده فخر ائدیرم.
سانکی بیر آنلیغا سالوندا نفسلر کسیلیب و یئنی‌دن جانلاندی. سانکی بیر آنلیقا هامی یوخو گؤرموش کیمی اولدولار. ائشیتدیک‌لرینه اینانا بیلمیردی‌لر. گومان ائدیردیلر کی، بئله جاوابی ائشیتمه‌ییبلر. مگر الی قانداللی بیر شخص حاکم و منصیفلر هئیتی‌نین گؤزنه دیک باخا‌راق بئله جسارتله نیطق سؤیله‌یه بیلر؟ اما اونلار فریدونون جاوابینی ائشیتمیشدی‌لر. فریدون منصیفلر هئیتی‌نین قارشی‌سیندا غررورلا و محکم اراده ایله دایانیب اونلارین رئاکسیاسینی گؤزلهییردی.
حاکم اوزونو فریدونا توتا‌راق سوروشدو:
یئنه ده بیر سؤز دئمک ایستهییرسن؟
فریدون اوزونو زنگنه‌دن دؤندریب منصیفلر هئیتینه خیطابن دئدی:
گله‌جک، آلین ترلی ایله ایشلهییب یاشایان اینسانلار اوچوندور. گله‌جک الیقابارلی اینسانلار اوچوندور. بیلمرلیسینیز کی، همین قابارلی اللر بوتون حبس‌خانا‌لاری داغیدیب، جللاداری و ظلمکارلاری محکمه ماساسی آرخاسیندا اوتوردا‌جاق. گون گله‌جک اسارتده یاشایان ایران خالقلاری، زحمتکئشلری باشقا‌لاری‌نین حسابینا یاشایان وحشی مستملکهجی‌لری کی، اونلارین اسارتینده یاشایان خالقلاری اؤز انسانی، میللی حقوقلاریندان محروم ائدیب، اونلارین حیات و میللی-مدنی حاقلارینی تاپدالایارایا‌راق، تکجه طبیعی ثروتلری دئییل، هم ده الیقابارلی اینسان‌لارین زحمتله الده ائتدیک‌لری گلیرلری حراجا قویوب، اؤز ثروت کیسه‌لری‌نین دولدورورلار، تؤرتدیک‌لری جینایت و غارتلره اعتراف ائتمه‌یه و جاواب وئرمه‌یه مجبور ائده‌جکلر.
منصیفلر هئیتی محکمه ایشتیراکچیلارین قارشی‌سیندا اؤلومون بیر نئچه آددیملیغیندا اولان اوندان بئله جسارتلی و تهدید دولو چیخیشی گؤزلمیردیلر. اما اونلار تاماشاچیلارین حضوروندا گؤروردولر کی، متهیم چیخارتدیغی اعدام حکموندن پشیمانلیق حسی یوخ، بلکه فخارت حسینی دویوردولار. بو اوزدن تاپشیریق اساسیندا اؤنجه‌دن حکمون بللی اولماسینا باخمایا‌راق یئنه ده ظاهری حفظ ائتمک اوچون باشلارینی بیر-بیرلرینه یاخینلاشدیریب مصلحت‌لشدیلر. قیصا پیچیلداشما‌لاردان سونرا باشلارینی قالدیریب و منصیفلر هئیتی‌نین صدری اوجا سسله بئله اعلان ائتدی:
متهیم آذربایجان دئموکرات فیرقه‌سی دؤورونده پروکرور اولا‌راق چیخارتدیغی اؤلوم حکمونه اعتراف ائتدیگی اوچون منصیفلر هئیتی سس بیرلیگی ایله اونو اعدام جزاسینا محکوم ائدیر.
فریدون درحال محکمه‌نین حکمونو رد ائده‌رک قورخما‌دان اوجا سسله دئدی:
منیم طالعیمی 10 نفر خالقین جانینا سوسامیش دوشمن حل ائدیر. من بو حکمو قبول ائتمیرم. منی خالق محکمه‌سینه گؤندرین، قویون خالق محاکیمه ائتسین. نه اولور-اولسون خالقین چیخاردیغی حکمو جانلا-باشلا قبول ائتمه‌یه حاضیرام.
عینی حالدا فریدونون دوداقلارینداکی تبسم بوتون محکمه ایشتیراکچی‌لارینی تعججبلهندیردمکله یاناشی، زنگنهنی دلیلندیردی. فریدون ایکی محافیظهچی‌نین آراسیندا سالونو ترک ائدرکن تبسمله تاماشاچیلااری سئیر ائتدیی زامان بیردن گؤزو سالونون خصوصی یئرینده اوتورموش زنگنه‌یه دوشدو. فریدون اونو عاجیز و جاره‌سیز وضعیتده گؤردوکده اوجا‌دان گولدو. اونون بو گولوشو زنگنه اوچون گؤزلهنیلمز اولدو.
پالکوونیک زنگنه اوزو و گؤزلری قیزارمیش حالدا فریدونو یئنی‌دن تهدید ائدیب دئدی:
گولوشونو دار آغاجیندا گؤره‌جه‌یم!
***
فریدونون اؤلومو تکجه تهراندا و تبریزده دئییل، بلکه سرحدین او تاییندا دا گئنیش رئاکسیایا سبب اولموشدو. بو حاقدا ایران خالق پارتیاسی‌نین(توده) قزئت‌لرینده چوخلو یازیلار یازیلیردی. بو یازیلاردا فریدونون جسارتله مدافعه‌سی، خالق و فرقه حرکانی‌نین نایلیتلری آلقیشلانیردی.
ایران اوردوسو تکجه جسارتلی و قورخماز بیر گنجله قارشی-قارشییا دئییل، بلکه خالقین دردلرینی چاره ائتمک اوچون آختاریشدا اولان بیر ایتی ذهنلی انسانلا اوز-اوزه ایدی. او ذهنلی گنج یورولما‌دان بوتون بو دردلرین گؤستریجی‌سی و ناشیری ایدی. بو ایتی ذهن صاحبی تاریخین بیر مرحله‌سینده سویغونچولار طرفیندن غارت اولموش خالقین پروکرورو وظیفه‌سینده چالیشیمیشدی. خانلار، فئودال‌لار، سارای آداملاری و کاپیتالیست اؤلکه‌لری او شخصه نیفرت ائدیر و کؤلگه‌سینی گولله‌لمک ایستهییردی‌لر. اما عکسینه اولا‌راق آذربایجانین زحمتکئش خالقی‌نین اکثریتی اونون وارلیغینا فخر ائدیر و غرورلا اونون حاقلی اولدوغونو گؤروب مدافعه‌سینی ایزلهییردی....
