یولداش واله قلی زاده
آذربایجان دموکرات فرقه سینین یئنی صدرین بیوقرافیاسی
یولداش واله قلی زاده رضا اوغلو 21 اردیهشت 1317 (10 مای 1938) تاریخینده اردبیل شهرینین «خوروزلو» کتدینده اکینچی بیر عایله ده آنادان اولوب.
اونون آتاسی رضا قلی زاده حضی اوغلو 1290- جی (1911) ایلینده اردبیلین «آق ایمام» کندیدنده اکینچی عایله سینده آنادان اولموشدور. او، جاوانلیغیندا یاخین قوهوم لاری ایله باکی یا گدیب و 1317- جی (1938) ایله قدر باکی نین «ایچری شهر» محلله سینده یاشاییب و نفت صنایع سینده فعله ایشله ییب. همین ایلده رضا قلی زاده عایله سی ایله بیر یرده باشقا ایرانلیلار کیمی ئوز ئولکه سینه ایرانا قایتمالی اولوب، یئنیدن اردبیل ماحال یندا مسکون لاشیبلار. 25-1324 جی ایللرده (46-1945)، ایراندا اینقلابی حرکت لر گوجله ننده، رضا قلی زاده آذربایجان دمکرات فرقه سی سیرالارینا قبول اولوندو. بوتون قوه سینی و امکانلارینی انقلابی مبارزه یه حصر اتمیشدیر
یولداش واله قلی زاده ائله همان آز یاشیندان آتاسینین یولو ایله آددیم آتدی و «هامارکند» ماحالینین تشکیلات صدری صفربابا بندی ایله تشکیلاتی ایشلرده امکداشلیغا باشلادی. او، اردبیل ماحالینین کسگین شاختاسیندا، صفربابانین سیفاریشی ایله فرقه فدائی لرینی مختلف ایستیقامت لرده مشایعت اتمیش و آتلاری کنده قایتاریردی. بونا گوره ده همیشه صفربابا طرفیندن آلقیشلانیردی. 1325 -جی ایلین آذر آیندا(دکابر 1946)، 21 آذر حرکاتی داخلی و خارجی ارتجاعی قوه لرینین بیرگه امکداشلیغی نتیجه سینده تاپدالاندی. شاه اوردوسونون ضابتلری قلی زاده لرین کنده کی ائوینه هجوم اتدیلر. اونلار واله ین آتاسینی توتوب نامعلوم ایستیقامته گوندردیلر و ائولرینی ویران اتدیلر، آناسی و باجیلارینی یاخین قوهوم لار گیزلتدیلر. یولداش واله ایسه کیچیک قارداشلاری ایله کسگین شاختا و قارلی گئجه ده قاپی و پنجره لری سیندیریلمیش بیر اوتاقدا گیزلنمه لی اولدولار. ساباهیسی سحر واختی ، یولداش واله باشا دوشدو کی، هر ایکی بالاجا قارداشلاری شاختادان دونوب هلاک اولوبلار.
چوخ ایشگنجه لره معروض قالان، 3 ایل عذاب - اذیت دن و قاچاق یاشیان دان سونرا، نهایت واله ین آتاسی تعقیب لردن یاییناراق ، 1328-جی ایلین آذر آیندا (دکابر 1949) ، عایله سی ایله بیرلیکده «بیله سوار» طرفدیندن سووت آذربایجانینا مهاجرت اتدیلر.
اونلار شاماخی رایونوندا اوزومچولوک ساوخوزوندا مسکون لاشدیلار.
یولداش واله قلی زاده اورتا مکتبی همین یرده بیتیردی و 1338 (1959)- جی ایلده قوبا شهرین کند صنایع ین عالی تخنیکوموندا اکینچیلیک شعبه سینه داخیل اولدو. او، تحصیل واقتی نمونه وی طلبه کیمی خاچماز ماحالیندا اولان قوسارچای علمی – تجربه شعبه سینده کیچیک علمی ایشلرده ایشله میشدیر. 1343(1964)-نجی ایلده واله قلی زاده تخنیکومو بیتیردیکدن سونرا، ساعاتلی صابیرآباد منطقه سینده نظامی آدینا کالخوزدا باش کشاورزی مهندسی وظیفه سینده ایشه باشلادی. یولداش واله قلی زاده ائله طلبه واختیندان اجتماعی، سیاسی و تشکیلاتی ایشلرده فعال ایشتیراکچی اولدوغونا گوره، 1342(1963)-جی ایلده آذربایجان دمکرات فرقه سینین قوبا شهر کمیته سینده تبلیغات شعبه سینین مسئولیتینه تعیین ادیلدی. ساعاتلی و صابیرآباد دا ایشله یرکن، اونون اجتماعی ایشلرده فعاللیغی فرقه نین علی بایراملی (شیروان) شهر کمیته سی رهبرلیگینین دیقتینی جلب اتدی. کمیته صدری یولداش علی حسین اسماعیل زاده تکلیفی ایله فرقه عضولویونه نامزد اولوندو. بیر آزدان، صدرین مصلحتی ایله شهر کمیته سینین پلنوموندا مشورتچی سسله ایشتیراک ادیردی. قیسا زاماندان سونرا، 1343- جی ایلین مرداد آیندا (آوگوست 1964)، شهر جاوانلار تشکیلاتینین صدری وظیفه سینه سچیلدی.
او، 54-1350 جی ایللرده (70-1971) عالی ایداره اتمه کورسونو شوروینین عالی پارتیا مکتبینده باکیدا موفقیت له سونا چاتدیردی.
یولداش واله قلی زاده 1358(1979)-جی ایلدن منتظم شکیلده فرقه نین مرکزی کمیته سینین پلنوم ایشتیراکچیسی اولموشدور و 1361 (1982)- جی ایلده فرقه نین علی بایراملی شهر کمیته سینین بیرینجی کاتیبی وظیفه سینه سچیلمیشدیر و ایندییه کیمی همین شهرده صدر کیمی مسئولیت داشییردی. او، 1361 (1982)-جی ایلده فرقه نین مرکزی کمیته سینین رسمی عضولویونه سچیلدی. یولداش واله قلی زاده 1364(1985)-جی ایلده ایران توده پارتیاسینین ملی کنفرانسینا نماینده سچیلیب و 3 آی افغانستاندا فعالیت ائدیب. 1367(1988)-جی ایلدن یولداش واله قلی زاده فرقه نین اجرائیه (سیاسی) هیات ینه سچیلمیشدیر.
واله قلی زاده عایله لیدیر و 5 اوشاغی وار.
