یئنی میلاد ایلی مبارک اولسون
۲۰۱٩- جو ایل دئکابر آیینین ۷-ده شنبه گونو آذربایجان رئسپوبلیکاسیندا قئیدیاتدا اولان ایرانلی مهاجیرلر جمعیتینین قادینلار تشکیلاتینین واسطهسیله (۲۰۲۰-جی) یئنی ایلین گلیشی مناسیبتی ایله جمعیتین قرارگاهیندا مراسیم کئچیریلدی. بو تدبیرده بیر سیرا آذربایجان دئموکرات فیرقهسی عضو و طرفدارلاری، هابئله قوناقلار اشتراک ائدیردیلر. بو مراسیمده خصوصی ایله جهانگیر و رافیق جهانگیروف(آذربایجانین مشهور بستکاری جهانگیر جهانگیروفون نوهلری) قارداشلاری دا اشتراک ائدیردیلر.
ایلک نؤوبهده ایرانلی مهاجیرلر جمعیتینین صدری فیریدون ابراهیمی یولداش مراسیم اشتراکچیلارینی تبریک ائتدی. سونرا او، اختصارلا تدبیر ایشتیراکچیلارینا جمعیتین بیر ایل عرضینده گؤردوگو فعالیتی ایضاح ائتمکله یاناشی، قارشیدان گلن یئنی ایلین هر کس اوچون شن و اوغورو ایل اولماسینی آرزولادی.
سونرا آذربایجان دئموکرات فیرقهسینین صدری دؤکتور عادیله چئرنیک بلند مراسیم اشتراکچیلارینی ۲۰۲۰-جی یئنی ایل مناسیبتیله تبریک ائدیب و دئدی: -اومید ائدیرم یئنی ایل بوتون دونیا، خصوصی ایله ایران خالقلارینا صلح، آزادلیق و امین-آمانلیق ایلی اولسون. بو یئنی ایلده ائله بیر شرایط یارانسین کی، دونیانین هر بیر یئریندن بوتون وطنسئور مهاجیرلر وطنه قاییدیب و آزاد-دئموکراتیک شرایطیده یاشایا بیلسینلر.
ایرانلی مهاجیرلر جمعیتینین قادینلار تشکیلاتینین صدری پوهن مؤمونات خانیم ییغینجاق اشتراکچیلارینی ساملایاراق، اونلاری یئنی ایل مناسیبتی ایله تبریک ائدیب و جمعیتین مادی- معنوی فعالیتینده امگی اولان هر کسه اؤز تشکورونو بیلدیردی.
مراسیم اشتراکچیلارینین آراسیندان بیر نئچه نفر ده چیخیش ائدهرک، ییغینجاقدا اشتراک ائدنلره بایرامی تبریک دئیهرک تدبیر اشتراکچیلارین هر بیرینه یئنی ایلده موفقیت و خوشبختلیک آرزولادی.
تدبیرین داوامیندا فریدون ابراهیمی یولداش مراسیم اشتراکچیلاری طرفیندن تشویق ائدیلهرک آلقیشلاندی. سونرا او، جمعیتین سیرالارینا قبول اولان اوچ نفر یئنی عضولره ایرانلی مهاجیرلر بیرلیگینین عضولوک کارتینی تقدیم ائتدی.
مراسیم موسیقی و رقصله داوام ائتدی. شنلیگین داوامیندا خانیم روح انگیز موسوی و طاهره مرادوا( روبابه مرادوانین باجیسی) اؤز گؤزل نغمهلری ایله تدبیر اشتراکچیلارینی سئویندیریب و روحلاندیردیلار. بئلهلیکله بایرام شنلیگی بیر نئچه ساعت داوام ائتدی.
