یاس لی ساوالان!
هر زامان كی باخيرام باشينا قار وار گورورم
اوغلو اولموش آنا تك گوزلرين آغلار گورورم
هر طرفدن چكيليب سينه وه داغلار گورورم
آی آلان اوستونو غم چيسگينی هريانی دومان
آی ياغان باشينا غم لر اودو ياس لی ساوالان!
ماهنيلار قوشماغا باشلار يئنه ده قوشماچی لار
ياز گليب گئتدی يئنه گولمه دين اوچ آيدا بير آن
آی آلان اوستونو غم چيسگينی هر يانی دومان
آی ياغان باشينا غم لر اودو ياس لی ساوالان!
قرن لر كئچدی سنين گولمه دی بير لحظه اوزون
قان لی ياش توكدو سارالميش اوزونه ياش لی گوزون
غصه دن دوندو قارانليق گئجه اولدو گونوزون
نه سوران حالينی اولدو نه ده بير ياده سالان
آی آلان اوستونو غم چيسگينی هر يانی دومان
آی ياغان باشينا غم لر اودو ياسلی ساوالان!
آند وئريرم سنی او قانه بلنميش داشيوا
گئجه گوندوز او گوزوندن توكولن قان ياشيوا
اوره یين دردينی بيلدير او سهند قارداشيوا
سنی وارليق سنی تانری سنی بو آه و فغان
آی آلان اوستونو غم چيسگينی هر يانی دومان
آی ياغان باشينا غم لر اودو ياس لی ساوالان
سالارام ياديما بير لحظه او كئچميشلرینی
توكولن سنگ جفا ائيله او دور ديشلرینی
ايزلرم بيربير او حيرت يارادان ايشلرینی
هاميدان من سنين احوالينا آرتيق نگران
آی آلان اوستونو غم چيسگينی هر يانی دومان
ساكت اول آغلاما قوی بيرجه چكيلسين بو دومان
گون چيخيب ظولمتی بير يوللوغا قووسون بورادان
"نبي" گلسين "بوزآت" اولسون يئنه داغلار آتيلان
"هجرين" بلكه ييغيلسين گوزو يول دان آناجان
آی آلان اوستونو غم چيسگينی هر يانی دومان
آی ياغان باشينا غم لر اودو ياس لی ساوالان!
سوندوره بيلمدی گوز ياشين اوركدن اودووی
چاغيريم قوی كومك ائتسين سنه اوز اولادينی
افتخاريله بوگون ذکر ائده رم پاك آدينی
مرد اوغول لار بئجريب خلقينه شهرت قازانان...!
آی آلان اوستونو غم چيسگينی هريانی دومان
آی ياغان باشينا غم لر اودو ياس لی ساوالان
بابكين گئتديسه بوش قالمادی آمما قوجاغين
دولودور مين ائله اوغلانلارلا هر بوجاغين
نه قدر يئل اسه طوفان قوپا سونمز اوجاغين
آی بلالر سپری خلقه يامان گونده آمان
آی آلان اوستونو غم چيسگينی هر يانی دومان
آی ياغان باشينا غم لر اودو ياس لی ساوالان
چنلی بئلده "دلی لر" قوی يئنه قورسون بساطی
"قوچ كور اوغلو" يئنه جولانه گتيرسين قير آتی
هئچ زمان اصلين ايتيرمز او كی دوزگوندو ذاتی
آند اولا آدينا آی گوزلری آغلار ياشی قان
آی آلان اوستونو غم چيسگينی هر يانی دومان
آی ياغان باشينا غم لر اودو ياس لی ساوالان!
بابالاردان بيزه قالميش بو مثل هاممی بيلير
سو گلن آرخا دئييبلر يئنه بير گون سو گلر
فلكين داش اوره یین داش اوخو آخيردا ده لر
"بارز" اوغلوندا يئتر سئوديگی ياره او زمان
آی آلان اوستونو غم چيسگينی هر يانی دومان...
آی یاغان باشینا غم لر اودو یاس لی ساوالان!!
عباس بارز
